حسینه یئرله ر آغلار گؤیله ر آغلار 
بتول و مصطفی پیغمبر آغلار

حسینون نوحه سین دلریش یازاندا
موسلمان سهلدیر که کافر آغلار

کور اولموش گؤزله رین قان دوتدو شومرون
کی گؤرسون اؤز الینده خنجر آغلار

حسینون کؤینه گی زهرا الینده
چکر قئیحا قیامت ، محشر آغلار

آتاندا حرمله ، اوخ کربلاده
گؤرئیدین دوشمن آغلار ، لشگر آغلار

قوجاغیندا ، گؤرئیدین ام لیلا
آلیب نعش علی اکبر آغلار

رباب ، نیسگیل دؤشونده سود گؤره نده
علی اصغری یاد ائیله ر آغلار

باشیندا کاکل اکبر هواسی
یئل آغلار ، سنبل آغلار ، عنبر آغلار

یازاندا آل طاها نوحه سین من
قلم گؤردوم سیزیلدار ، دفتر آغلار

علی ، شق القمر ، محراب تیلیت قان
قولاق وئر ، مسجید اوخشار منبر آغلار

علیده ن شهریار ، سن بیر اشاره
قوجاقلار قبری ، مالک اشتر آغلار